علماً سمعته لاعني وادمع العين
والصدر فيض عبرته بانهشامه
ساعة اذاعوا بالوفاة المذيعين
وفاة من فيه الوفا والشهامه
هذا لزوم الدمع هليه ياعين
ياعين لوتبكين مالك ملامه
هلي غزير الدمع به لا تكنين
على عزيزاً شد صفط خيامه
على سعد فقيد كل المودين
الكل يشعر بالألم والندامه
الحزن خيم في قلوب المحبين
برحيل من حاز الفخر باهتمامه
حنا الذي في بالغ الحزن ناعين
سعد بن خالد وفقدا مقامه
سعد رحل عن دارنا قرة العين
عسى له الجنة مقر الإقامه
غيث العواني والضعوف المقلين
الله يغفر له ويحسن ختامه
اللي بحياته في جميع الميادين
مقره من المجد ذروة سنامه
وان جاه مظلوم بظلم الشياطين
نجاه والظالم يجود بلامه
هذا كلام ثابتاً بالبراهين
جميع مفخرة تقلد وسامه
وحنا بحكم الله وقضاه راضين
اللي خلقنا خاضعين لمرامه
وعسى عوضنا بالرجال الوفيين
خالد ومحمد كاملين النشامه
مامات من خلف رجالا حريصين
على المراجل ماسكينا زمامه
فيهم عزانا دوم جعلوا عزيزين
وعسى لهم طول البقا والسلامه
وختامها عداد جمع المصلين
على النبي صلاتنا في ختامه