ورقة قديمة

يا راكب اللي ينجبونه من التيه
يرعى زهر نوار عشب السحابه
عامين مع ذروه طياح معفيه
الا بدالي حاجة جاك مابه
فوقه صبي يوصل العلم راعيه
قرم يودي حاجة اللي عنابه
باغيه يا خذلي سلام يوديه
ربعي مطوعة العدو بالحرابه
ان سايلوا عني يقولون وش فيه
ابد العلوم اللي معك لا تهابه
قل له تعد ما حوله أحد حواليه
بدو من البيدا تطارد سرابه
في سهلة ما عنده اللي يحاكيه
بس الطيور الطايرة والذيابه
اصبر على ما صاب نفسي وامضيه
واطلب لعله خيرة والهوى به
اتنا ابن عمي لين ربي يعافيه
والا يصير بحفرة من ترابه
هذاك عذري عند ربي وأهاليه
اما بري والا ان يومه غدا به
قالوا لي الحساد لياك تطريه
ولا طعت ان الهراج واللي حكا به
علي دين يا ابن عمي ما أخليه
أخاف من هرج علي به عتابه
اخاف من هرج يجي به ويبديه
نقالة الهرجه على غير جابه