دلال المواجع

تناسيت الخطا لجل العيون اللي ملاها الشوق
ومسحت الزلة بوجه الجروح وقلت بيحيني
وخاصمت الخفوق اللي بليته باالخطا والعوق
لجل همي لجل حزني لجل جرحي لجل عيني
ومسحت الجرح باطراف البنان وقلت خلك فوق
دخيلك لا تهزك يا خويي قسوة سنيني
تحملت الخطا يوم الخطا ساقه ظليل الموق
تحملته لجل رمعة عيون ورعشة يديني
حبيبي والخطا سيف له بجال الخفوق بروق
على حده تساوى يالعطيب الزين والشيني
تمهل واسحب جيوش الخطا يا صاحبي برفوق
واذا لك في الخطا نيه ترى اللي فات يكفيني
حبيبي لو سمحت ارجع ووقف عند حد الذوق
تمهل قبل تطرحني ولا القى من يداويني
تمهل ما على بعض الجروح الغايرات شفوق
قبل لا ينصب جدار الجفا ما بينك وبيني
من دلال المواجع لا تقهويني الخطا يا شوق
يكفي واكرم الله يا رفيقي من يقهويني