يحكم بها العاقل

إن قيل عيد أقول من جيز الأيام
العيد من شاف السّعادة تروده
تضحك له أيامه بتحقيق الأحلام
ولا باح من غير الليالي سدوده
دايم سعيد الحظ والحظ له قام
حظّه على الدنيا قوي وروده
ولياضواه الليل في مرقده نام
ما ساهر هموم تضعِّف جهوده
ما عقّد حجاجه من الهم منضام
ولا هلّت دموعه تجرح خدوده
ما هوب مثلي حطّه الوقت مرسام
يصبر وصبره زايدٍ عن حدوده
يجامل العالم بتخفيف الأوهام
هايم ونفسه من عناها تزوده
تقصر به الهقوات لو كان جزّام
يكظم على المرّه ويكثر صدوده
يحسب ليالي العمر واليوم له عام
ويسهر ايلين الصبح يبدي عموده
ما له جدى ياكود عضّه بالأبهام
ولادك به هاجوس شرّه يذوده
يكتب بيوت الشِّعر وبخط الأقلام
يكتب وشعره واحدٍ من شهوده
تشهد بيوت الشعر في ليل الأظلام
وبعض البيوت من الزمان محموده
يحكم بها العاقل على حقّ الأحكام
ويبحل بها الجاهل وتبرد زنوده
يحتار راعي الخيل وتحير الأقدام
وينجى بها الفارس وتنجى جنوده
ويضيع ساري الليل ويخاف الألغام
وتفرج لمن قال السّنين معدوده