أفتش الصفحات وأقرا الكتابة أتابع اللي بالمقامات مذكور عن الوطن وش قيل به وش جرى به مريت في صفحة مدارات منشور لمحت بالعنوان بعض الغرابه لديت باسم الرجل وأحجمت مبهور ولا استطعت أرد بالحال جابه الدمع من عيني طمس خمسة سطور من ما نشر والصدر زاد التهابه في ضامري جرح له سنين وشهور بعض المصايب مع بعضها تشابه يابن منيع الولف راعيه مطيور ليتك عن المصيوب سكرت بابه لو صاح بأعلى صوت يا شيخ معذور ما سر صوته مبتداه انتهى به من لا وطاه الوقت ما عنده شعور مصاب غيره مر به ما درى به مالايعه فرقا الغلا لوع مغدور ما يفرق أحجار الجبل من ترابه يا شيخ عبدالله عسى الذنب مغفور نرجي من المعبود ضافي ثوابه ارفق بمن قلبه من الفقد مكسور لا تجرح المكلوم يكفيه سابه يرجي من الله يجبر الكسر مستور يكتم بصدره ما شكا من عذابه ما قلتها بك شايفٍ نقص وقصور أنت الفصيح اللي عزيز جنابه علمك وتعليمك ومنهجك دستور واسمك بساعات اللقا يعتزابه يا شيخ وش باليد من الله مذخور إلا الدعاء عند البلاء والإنابه نرضى بحكم الله وابليس مدحور نعيش واقعنا بشكر ورحابه اصبر تجد بالصبر جنات ونهور أدعو لكم في ما محمد دعابه ما ضاع لك تلقاه باكر مع الحور الله لعبده بينه في كتابه اقبل تحياتي وعذرني ومشكور بلغ سلامي لأم مصعب نيابه فراج بن سليمان الفراج
