هدية ما من وراها جزيه

دام النصيحه حق تشرى وتنسام
من شاعرٍ ساقه لدينه حميه
وده يعم الخير وتعم الانعام
هديةٍ ما من وراها جزيه
الحق ترى وقت الملذات مادام
تب لله اللي عالمٍ بالخفيه
وجنب عن دروب المعاصي والآثام
اكثر من التسبيح واقرا التحيه
واستغفر المعبود خلاق الانام
صل الصلاة وحج واذبح ضحيه
وصم رمضان وزك وارفق بالايتام
خلك بفعل الخير كفك نديه
وبوالدينك بر واخضع للارحام
احفظ لسانك لا يجي منه اذيه
لا تتركه في عرض الاجواد سوام
احرص على اهل الخير واهل الحميه
خلك مع الاخيار زاكين الاذمام
ترى الخوي يمشي بدبرة خويه
اما ورا والا مع الركب قدام
ما تنتهي لذات نفس شقيه
واللي يطيع النفس لا طاح ماقام
اغنم حياتك قبل يوم المنيه
ترى العمر لو طال تفنيه الايام
وان طعتني تلقى حياة رضيه
ترتاح من عيش التعاسة والأوهام
تلقى السعادة والحياه الهنيه
اذا مسكت الدرب واحسنت الاسلام
قلته وانا اخشى من دروب الخطيه
لو كان قلبي عن دروب الهوى شام
وختامها صلاة رب البريه
على النبي ما هب ذعذاع الانسام
عبدالله مرزوق المرشدي