بقايا إنسان

خذيني إحساس شاعر يكتبك فبداية الديوان
قصيدة بأول الديوان يتنقّى معانيها
وخذيني شاعر حروف الغلا ومهندس القيفان
حروف الشعر في وصفك تجيب أحلى قوافيها
وخذيني فكر هايم يذكرك في لحظة النسيان
نسى لحظة وصرتي له دقايقها.. ثوانيها
وخذيني لوحةٍ ترسم.. وحبك ريشة الفنان
وخذيني جروح عشقٍ من لها غيرك يداويها
وخذيني في الهجر غربة.. وسمّيني بقايا انسان
وخذيني في اللقا فرحة تبكِّيني وأبكِّيها
خذيني.. وإلاّ أقول إلاّ اتركيني في الهوى ولهان
ما دام إن القضية أنتِ أولها وتاليها