مهبط الوحي

مهما كتبنا فالوطن من اجزل أنواع الكلام
ما نوفيه حقه علينا يشهد الله العظيم
هو بيتنا اللي فيه نلقى الدفء والماء والطعام
مستقبل الأبناء وحاضرنا وماضينا القديم
يحضن حرم طيبه وقبله يحضن البيت الحرام
هي مهبط الوحي وبلاد العز والخير المقيم
مهد الرساله منبع الاسلام هي دار السلام
الله يحفظها ويحميها من ابليس الرجيم
نحب كل ترابها نحب زمزم والمقام
حب ارضها واحد ما نفرق بين جده والقصيم
توحدت اركانها في عهد ابو تركي الامام
عبد العزيز اللي عسى قبره لجنات النعيم
واليوم في عهد الفهد ولت دياجير الظلام
قامت صروح شامخة في خدمة الشعب الكريم
وحنا لها وقت اللزوم حصون ودروع وحزام
عدوانها نحدّهم عنها على صال الجحيم
لا لا يهمك يا وطن زمرة خفافيش الظلام
ضلوا بعيد عن الهدى وعن الطريق المستقيم
افتوا بتحريم الحلال وحللوا شيء حرام
افكار مرفوضه من الاسلام والعقل السليم
تجردوا من كل خير وصاروا ألد الخصام
من افعالهم كم حرمةٍ رملا وكم ورع يتيم
هم ما دروا ان الوطن دونه عيون ما تنام
دونه رجال تحرسه من كل مجنون وغشيم
يقدمون ارواحهم دون الوطن وقت الزحام
رجال تقدم للخطر في ظلمة الليل البهيم
الله يديم العز الك يا دارنا في كل عام
ويجعلك دايم من تطور في تقدم للامام