مرحوم

رثاء في عبد العزيز آل محمد الراشد الحميد (أبو فهد) رحمه الله :
بديت ذكر الله على كل تعبير
اللي نساله بالرخا والقصيه
البارحة كثرت علي التفاكير
ما هو جزع لا شك غصب عليه
يا أبو فهد دارت عليك المقادير
لما وقعت أبوسط حوض المنيه
مرحوم يلي لك معزه وتقدير
فرقاك ما هيب البسيطه عليه
مهما تحذر ما تفيد المحاذير
الدايم الله والفنا للبقيه
الموت حق ولا عن الموت تطيير
من جاه يومه شد صبح وعشيه
ملك الموت ايذوق ماذاقه الغير
عدالة المعبود رب البريه
يجزاك ربي خير يا فاعل الخير
يغفر اذنوبك مطلع بالخفيه
دنيا قشر يا بوفهد ما بها خير
دنيا تفرق بين حي وحيه
فقيدتك له عندنا صار تأثير
ما هي بسيطه يا شريف الهويه
عند المواجب ما حصل منك تقصير
يا قل جنسك بالوفا والحميه
ونشهد انك ما تحسب المخاسير
منتب من اللي يحسبون الوقيه
تفرح الى جوك الرجال المسايير
فعل المراجل دوم نفسك قويه
صلوا على آل مختار ما طار من طير
واعداد ما هلت مطر وبرديه
تمت بذكر الله على كل تعبير
اللي نساله بالرخا والقصيه