إنسان ثاني

ليه أحس إني معاك إنسان ثاني
وإني أسعد شخص في هذا الوجود
وان في يديني مفاتيح الأماني
وكل درب أمشيه مفروش بورود
ملهمة قلبي خذاها اللي خذاني
عيونها تشهد ونظراتي شهود
كن عالمها عن الناس احتواني
وكنّها للقلب واشواقه وقود
كل يوم ألقى لها صرح بكياني
كل يوم وعشقها فيني يزود
كلها ذوق وأحاسيس ومعاني
تجبر الخاطر وتصدق بالوعود
أكره الدنيا إذا غابت ثواني
واستعيد بوصلها الدنيا وزود
يا هواي اللي من الناس اصطفاني
الغلا ما له وسط قلبي حدود
كل ما شفتك تسمرت بمكاني
كن فعيونك لخطواتي قيود
كلمتين وكنّي مضيع لساني
نظرتين وكل ما فيني يجود
من عرفتك وانتِ الفرح بزماني
وكل ما شفتك تمنيت الخلود