سلطان القلوب

غلاك ما يحتاج وصف وتعبير
شفتك وقلت الفضل والحمد لله
يومك بخير.. وطلتك كلها خير
وطير الفرح غطى سمانا بظله
ما بين تهليل.. وما بين تكبير
سلطان سلطان.. القلوب انهجن له
والحب لك ينساق سوق المقادير
والناس تدعي والدعاء بك محله
وسلمت يا فكاك عسر المعاسير
يا ظلنا.. اللي كلنا نستظله
ياما وفيت ولاحصل منك تقصير
وانت البحر.. في كل دقه وجله
عطاك ما له حد عندي وتقدير
وانت الدواء.. يا مداوي كل عله
ودايم هل الحاجة ببابك طوابير
وسيفك بوجه الوقت.. سيفك تسله
بالرأي والحكمة وحسن التدابير
يا عزنا لاصار بالحال ذله
بك الرجاء عن كل.. ما صار.. ويصير
ويا ذخرنا..بايامنا المسفهله
والخير له بشرى.. وشوفك تباشير
تشرق علينا مثل شمس مطله
لا ضاقت الحالة تجي دون تأخير
ونفرح بشوفك.. فرحة العمر كله
وحنا بعز وخير.. مادامك بخير
عبدالله حمير القحطاني