ما دافعوا دون النفوس

الفئة اللي ما عرفنا هدفها
في ذمتي يا ناس ما همب صاحين
المشكلة جت كلها من طرفها
وأهل الوطن والدين منهم بريين
إبليس عن درب العداله حرفها
لين اصبحوا مع زمرة الشر غاوين
ما دافعوا دون النفوس وشرفها
حتى نقول ان الجماعة شريفين
كم واحد دمعة عيونه ذرفها
من حر ما يونس على الربع الأدنين
اعمالهم تخريب كل عرفها
واهدافهم تفريق بين المسلمين
مثل الذي عود على امه حذفها
هو يحسب أن الناس ما همب دارين
يا ليتها تنهج مناهج سلفها
اللي على حب البلاد متواصين
حنا مواقفنا الشعوب تعرفها
خدام للبيتين وحماه للدين
واللي خيوله للحروب يعسفها
ما همنا لو كان يحشد ملايين
حنا امة بالوسط ربي وصفها
مع سنة المبعوث للدين ماشين