تكفيه كلمة طويل العمر بالقمة

أميرنا اللي يعقد الراي ويحلّه
والي عهد قايد الأوطان والأمه
عبدالله اللي ملك حب البشر كلّه
حتى السلاطين لجل رضاه مهتمه
عز العرب فيه عز الدين والملّه
هم العرب جاريٍ فالعرق مع دمه
يمناه سيفٍ على الاهاب منسلّه
وتصافح اللي يريد الخير وتظمه
شعب الجزيرة بظل إخوانه وظلّه
من فضل رب البرايا كاشف الغمه
نفديه بأموالنا وأرواحنا فدى له
واللي يبي يغدره ما جابته امه
والليبي اللي فقد عقله يخيّل له
يبغى يطول البدر في عالي القمه
ابليس مغويه في عقله يسوله
دايم معه لا صحى من غفلته خمه
خبل لقى مثله خبول تطبل له
مجهول ما ينعرف خاله ولا عمه
خاين والافكار تعبانه ومنحله
لا دين عنده ولا نخوه ولا ذمه
يبغى الردى مع طويل العمر عبدالله
ما يدري انه بكاسه شاربٍ سمه
عبدالله اللي معاني الطيب تنزل له
وكل الخصال الحميدة فيه ملتمة
حرٍ شهر بالسماء ما هو بواصل له
تفنى حياته ليا فكر يجي يمه
أميرنا سابقه ما هو بندٍ له
يخسى ردي المعادن واطي الهمه
الموت قدام والقبر يتحين له
تكفيه كلمة طويل العمر بالقمه