طال هجرك

يا خدين الهجر أنا والليل محتارين فيك
وأنت والنسيان يالمزيون مولودين توم
يا ما شاء الله يا ما شا الله يا سلام الله عليك
يا قمر يا بدر يا برق يشعشع بالغيوم
يا زهر يا ورد بالبستان كلٍ يهتويك
ياسنا يا نور يا ديباج يا نجم النجوم
يا ذهب يا در ياياقوت محدٍ يشتريك
كود من حظّه ليا ضاقت به الدنيا يقوم
يا قمر خمسة عشر خمسة عشر وأنا أرتجيك
وكلها راحت سراب. وطيف. وآمال. وحلوم
ارحم العاشق عسى الرحمن يرحم والديك
طال هجرك والليالي بالسعادة ما تدوم
الحنيني لونسيته والله إنه ما نسيك
حيث له في شوفتك يا شمعة الدنيا لزوم
والله اللي ما سوى وجهه إله ولا شريك
إن حبك في صميم القلب للعليا يشوم
انت عمري وإنت روحي وإنت شوفت ناظريك
تجلب البهجة وتنسيني دياجير الهموم
أعشقك وأموت فيك ويا جمال الروح أبيك
وفوق هام السّحب إذا غامرت في فعلٍ مروم
العواذل قولهم يا نور عيني لا يجيك
يا سلالة حرب وافين الفعايل والسلوم
أهلك اللي في فعول الطّيب ينجون الدريك
أهلك اللي في فعايلهم صناديد وقروم
المحبه والغزل والشوق والأشجان فيك
والقصايد والخواطر والسوالف والعلوم
واسلم اسلم بالسلامة جعلها تسلم يديك
وإن بغيت الهجر رح مع السلامة ومحشوم