رثائية

هذه القصيدة في رثاء الفقيد / شارع بن قاعد الوهاب رحمة الله
الله من قلباً طوى الليل مهموم
هاجوس قلبي عن منامي نحابه
بندر عيوني لو جفت لذة النوم
مالومها باللي تقافت ركابه
كني عقب علمه على الوجه ملطوم
يوم أخبروني هيض الصدر مابه
لا شك هاذا أمراً على الخلق محتوم
والموت حق وكل مؤمن رضابه
لو ينفدي نفداه في فارق السوم
اللي عن الضيفان ما صك بابه
اللي ينادي للكرم دايم الدوم
وغير الكرم والطيب عنده حبابه
راع الفضيلة ما بها قول وعلوم
عند العوارف أله قد ومهابه
طلق الحجاج اللي بعيداً عن اللوم
جاري وأنا أبخص دربه وما مشابه
عن الريا والشك والزيف محشوم
جاراً لجيرانه بصدره رحابه
ورجال عرف وله تقاليد وسلوم
دايم أبوغازي عزيزٍ جوابه
مرحوم ياللي عادته يذبح الكوم
عسى جليل الملك يجزل ثوابه
وعساه من تعذيب اللحاد مرحوم
وفي جنة الفردوس يحسب حسابه
ويالله يا عالم خفا كل مكتوم
يا منزل الما من نواشي سحابه
يا جابرٍ في قدرته كل مقسوم
تحسن عزى غازي وتجبر مصابه
وتصبر اللي عقب سلطان مكظوم
أهله وجيرانه وكل القرابه
وصلاة ربي عد ما تنشي غيوم
وإعداد ما سار القلم بالكتابه
على النبي اللي بلى شك معصوم
عن الخطأ اللي شرف الله جنابه
سعد سعود بن مغلي الحزيمي العتيبي