سيد الطيب

عندما تكرم علي صاحب السمو الأمير سلطان بن محمد بن سعود الكبير
بإهدائي فرس من أغلى أفراسه وهي الهلالية أهدي لسموه الكريم هذه المشاعر الصادقة
الشعر له حزه وله وقت ينقال
وصدق المشاعر مفردات المثايل
لي بالقصايد بعض الاحيان مدخال
وصعب الفرايد ما يجي بالسهايل
وليا كتبت بطيّبٍ ما به جدال
ابي امدحه بالقول والراس طايل
تلين له صعب القوافي وتختال
وتطرب لطاريه العشا والقوايل
سلطان ابو نايف كسب زين الامثال
والقول ما يثبت بليا فعايل
ليثٍ تهقويه المكارم والافعال
تاصل يمينه عاليات الطوايل
يمنا الكرم مداتها دايم جزال
تعوّدت في معطيات الجزايل
يمنا كريمٍ يشربه شرب فنجال
ويشد لشداده ظهور الاصايل
ذرب اليمين اللي له الجود مدهال
نزه الجناب اللي فعوله هوايل
حرٍ مراقيبه طويلات الاتلال
ما يرقب الاّ عاليات الطوايل
وليا نزل من مرقبه مثل همال
غيثٍ يربّع بالديار المحايل
بحر الكرم كفه مثل وصف شلاّل
يعطي العطايا بكثرها ما يسايل
قلت القصيد وخاطري فيه ما زال
يقول به كل القصايد قلايل
كل الكلام اللي خطرلي على البال
يقصر ويبقى سيد الطيب طايل