فرحان ضبعان المطرفي /نادي الفروسية

هلا بك.. والوطن كله يقدم لك تراحيبه

توكلنا على الله يوم جا للقافية ميلاح
هلا بك يا قصيد ما تونا في مواجيبه
قصيد ما يجي في حزة اللازم نصيبه طاح
ان كانه ما يقوم بواجب المطلوب ما لي به
مزون الشعر هلت من نشا غيمة وبرقه لاح
ونفسي للقصيد الزين هو منوة مطاليبه
هلا يا مرحبا بالقايد اللي قادها بنصاح
هلا كل يقوله مرحبا يا مطول الغيبه
هلا والله يابو فيصل قوي الراي والمشواح
هلا بك والوطن كله يقدم لك تراحيبه
افراح المملكة زادت بها الافراح زود افراح
بلاد من وفاها قايد الامه تحيي به
تحيي قايد قاد المسيرة واحتزم بوشاح
على صدره وسام العز ساس المجد يمري به
فهد يوم انها تحسب مكاسبها مع الارباح
مكاسبنا المعزه في ذرا ليث نماري به
فهد كل العروبه تمدحه ما همه المداح
يبي فيها مثوبة من بامانه مكه وطيبه
فهد له بصمة يشهد لها التاريخ ماتنزاح
شهدها من عليه اقسى الزمن فرت دواليبه
دخيله في ذرا رب الملا يرقد وهو مرتاح
يزيح الهم عنه ويكرمه صافي مشاريبه
دخيله لا زبن يمه يطيب وخاطره ينساح
زبن في راس عيطا ما يضيمه من يثاري به
ابو فيصل تماري به ليا حمي الوطيس سلاح
يرد الكيد عنا والخصيم يزيد تأديبه
وحنا اللي فداه بدمنا وبغالي الارواح
محبتنا ولا واخلاص من جوده ومن طيبه
حكمنا بالشهامه والكرم والجود والاصلاح
له التقدير منا والفهد له حشمه وهيبه
هلا يا درعنا الواقي هلا يا سيفنا النطاح
هلا بالصيرم اللي ذاق خصمه من مخاليبه
يحييك الوطن واهل الوطن بالليل والمصباح
عسا بالحل والترحال دوم العز تمشي به