الطيب

للطيب نظرة في عيون المواجيب
وللطيب نخبة في طراته وحله
أما يجي من عشق والا مواهيب
والا ابتناه اللي ربى في محله
تشيب هامات الرياجيل مايشيب
وان ساق معيار الهدف مايزله
همة اعلوه فوق روس المراقيب
يارقابة النوماس فوق الاهلة
شواهده لو غاب راعيه ما تغيب
في ما قفه والا بصفحة سجله
الطيب للي يجهله دربه اصعيب
يشقى به اللي يعشقه ما يمله
يا بعد فرق الناس في محور الطيب
وياقرب عوق المعضلات المضلة
كم واحدٍ يخطي به الوقت ويصيب
وعن ما يريب النفس قلبه يدله
وكم واحدٍ يشره على مخاوي الذيب
وتقصر مساعي همته ما وصل له
كم واحد لاقام وفّى المطاليب
واليا زهمته جاك للطيب كله
كم واحدٍ له بالجمايل معازيب
حلحيل رأي وكل عقدٍ يحله
يفداه من هو لا يودي ولا يجيب
وان غاب ماني ناشده وش حصل له
قلته وميرادي قراح المشاريب
وتحيتي.. مع نفحة العود دلة