قبلت عذرك

يا هاجري ما بالتجافي مسرّه
حاسب ضميرك فكّر أشوي بالهون
من هو حكالك ناويً لك بشرّه
مصيبة العشاق قولة يقولون
قبلت عذرك بالغياب ألف مرّه
وتقول هوّنها ولا ظني اتهون
وأنا عليك بكل حال اتشرّه
وعنّا ياليت الحاسدين يتخلون
والحب حرباً بين كرّه وفرّه
موتٍ من العينين في هيئة اطعون
وكلن على كيفه وله نفس حرّه
لكن على مغليك لا تصير فرعون
يا هاجري دام الوصل لي مبرّه
يا كيف للغرقان تقطع يد العون
تنسى وتتركني بشوق ومضرّه
وإن جيت ما تسأل؟ وأقول أنته اتمون
وتقول حبي في خفوقك مقرّه
وتقفي وتبغاني أصدّقك وشلون
لو كان في قلبك من الحب ذرّه
ما كان تنسى الحب هاللون/ هاللون