الحزن عم الكون

ذكراه يبقى حي لو كان ماتي
سطر له التاريخ باسمى العبارات
سجل حافل سيد المكرماتي
سمح المحيا والنوايا سليمات
جزل الفعايل صانع المعجزاتي
اللي رقا بالمجد روس الطويلات
أبو اليتيم وكاسب الطايلاتي
مزبان من ضاقت عليه الوسيعات
قولٍ على فعلٍ صحيح ثباتي
حلّيل حلّال العقد والشكلّات
إن جا نهارٍ فيه حل الشكاتي
وين أنت يا ساس الوفا والمروات
الي وصوفه كلها نادراتي
يا من ترك في منبر الجود بصمات
في حاضره وايامه الماضياتي
فرقاه نار ومن كبار المصيبات
والي كتب باللوح ملزوم ياتي
العين من حر المفارق مشقّات
عافت لذيذ النوم عيّت تباتي
الكل صاح وقال في عال الاصوات
لو ينفدي لافداه وارخص حياتي
الشعر يبكي والضماير حزينات
والحزن عم الكون والكايناتي
يا الله يا رفّاع سبع السموات
يا عالم المستور والخافياتي
يا من كفيت أيوب شر البليات
يا مكلمٍ موسى بلا واسطاتي
ترحم ولي العهد راع الجميلات
والعبد عن خالقه ما له غناتي
عساه بالجنه مع أهل الكرامات
حيثه من اللي يعمل الصالحاتي
أمين يا محيي البلاد المحيلات
يا رب يا رحمان تقبل دعاتي
الموت حق وما مع الموت حيلات
واعمارنا لا بدها زايلاتي
الشاعر/ فهد بن عبدالعزيز الرميان - بريدة