قلي وأقول

يا سائلي وش ودك أتعرف وتضيف
قلي..و..أقول لك البراهين شفها
على شموخ العز بصمة..و..تشريف
مكانةٍ ربي وهبني شرفها
والمفردة في كل نصٍ..و..تصنيف
أشوم عنها كان غيري عسفها
ما أحبها بالكم عشقي لها كيف
والشاردات اطرب لها لا قطفها
فكرٍ يوظف جوهر الشعر توظيف
شواهد المعنى الثري ما حرفها
والغاية اللي سرّها بالسراجيف
من عنفوان الذات تاخذ ترفها
هقواتها ما هي على جرفٍ مهيف
من قمة طويق المسمى طرفها
ما جا لها في ملتقى الطرق توقيف
على مسار العز.. يسمو هدفها
مضمون ما تحويه ما فيه تحريف
وأنا لها رغم السنين..و..كلفها
ما دق هاجس خاطري بالمناكيف
عنها..و..عز أحلامها ما جرفها
تيار رأي مضيعين المعاريف
وكثرة وعود العاجزين...و..أسفها
هذا..و..أنا لو خاطري شفق..و..معيف
ما الغي مشاريه العرب..و..احذفها
الحق سيف..و..مصدر الباطل ضعيف
والنفس عند اللي خلقها.. نصفها
ومشاعري مهما تصير التكاليف
بيضٍ على طول الليالي صحفها