يبكيه شبان ويبكيه شيبان

اكتب تعازينا لأمير الرياضي
نبي نعزي راعي العز والشان
في موت كساب الثناء والبياضي
النادر اللي كنه النجم لا بان
سوات نجمٍ في دجى الليل ياضي
فهد.. خبر موته غشانا بالاحزان
كلٍ من الاحزان يشضاه شاضي
عليك يالنادر سلايل كحيلان
اللي لفعل الخير دايم يحاضي
انهل دمع الحزن من فوق الاوجان
الدمع من مكنون الاعيان فاضي
يبكيه شبان ويبكيه شيبان
ويبكي المريض اللي جروحه غلاضي
ويبكي على موته ضعايف ويتمان
ويبكيه من شحت عليه المقاضي
ولو كان دمعٍ سال من موق الاعيان
على الثرى تخضرّ منه الفياضي
ويا ميرنا اللي كان للمجد عنوان
يشهد له التاريخ حاضر وماضي
نرجي له من الله مثوبه وغفران
عساه يسكن بالجنان العراضي
ويوم الاجل مكتوب من عمر الانسان
والعبد فاللي قدر الله راضي
وعند المصاب الصبر من قو الايمان
والامر لله ما عليه اعتراضي
وصلاة ربي عد همال الامزان
على النبي.. واعداد مالبرق ناضي
زهران عون الله المطيري
بريدة