حلول اللغز

نشرنا في عدد الأسبوع الماضي لغزاً كتبه الشاعر عطا الله سليمان العطاالله وكان نصه:
أنشدك عن رجل رفع راسه الدين
ماله بكل الكون شي يشابه
تخضع له الحكام وأهل الملايين
والناس فيه تشوف عز ومهابه
عالي ولايقدر على حبه اثنين
وموجود من قبل النبي والصحابه
*****************
وقد جاءت الحلول كثيرة كالعادة مما اضطرنا الى استخدام القرعة.. فجاءت الحلول التي اختارتها القرعة.. كما يلي:
هلا بلغزٍ من عطاالله هلاوين
ينشد عن اللي له من الله مهابة
الحجر الأسود ولافيه تخمين
ومن طاف بالكعبة لزومٍ بدابه
عمر بن عبدالعزيز القصير - بريدة
*****************
يامرحبا ياشاعر جاب ثنتين
لغزٍ يتيم.. وخالي من الرتابه
يسأل عن اللي انهبوه الشياطين
ورده كريم سعد من هو لجابه
وقبله حدث تصادم بين جمعين
وجاهم أعز الناس وأعطى الإجابه
محمد بن حمد البدر - الزلفي
*****************
ياهل الجزيرة ياالرجال الوفيين
فوق البحر هلت دموع السحابه
بامر الكريم اللي يجونه ملبين
يرجون غفرانه ولاصك بابه
أصحابنا ما يبخسون الموازين
اللغز بالكعبة لقينا جوابه
محمد عبدالكريم الغزي - الزلفي
*****************
الحل جبته لك وجبت البراهين
هذا الحجر لسود وكلٍ درابه
كم طافوا الحجاج حوله ملبين
منه ابتدا اللي طاف ثم انتهى به
شاهر سعيد شاهر الشهري - الرياض
*****************
«هو الحجر» تلقاه قرب المصلين
«وسط الحرم» متعلق في مهابه
والكل يبغى حبته ياالمسلمين
وسهل على اللي يقصده في شبابه
طارق بشير - روضة الجندل
*****************
تراث الجزيرة يتابعونه ملايين
يجود بالأشعار مثل السحابه
طرحولهم لغز يعرفه فهيمين
واللغز واضح ما يبيله حسابه
الحجر الأسود يقبلونه ملبين
من طاف بيت الله نصاه وبدابه
ناصر بن مقبل العنزي - الرياض
*****************
للكعبة الغراء عموم المصلين
اتوجهوا )لله( يرجوا ثوابه
هي قبلة المسلم بكل البلادين
فيها ) الحجر الاسود( وكل درابه
عبدالله بن فايز بن شاهر - الرياض
*****************
حنا للغزك يابن الاجواد حالين
هو الحجر الاسود بركنه مثابه
بالكعبة اللي قبلة للمصلين
يارب تحفظها بامن ومهابه
عثمان بن شاهر الشهري - الطائف
*****************
مثل البياض.. وفاله اللي بعد زين
طير السعد رفرف وعوض غيابه
حاش الجزيلة والندى موفي الدين
وغال الذهب بالسوق باع وشرى به
يالله عساه يطوف بالبيت ياحسين
وعند)الحجر( يدعي.. ويرجي ثوابه
فهد الجروان - الزلفي
*****************
ياللي كتبت اللغز في نظمه الزين
حنا عرفنا للرجل والاجابة
حجر ولونه أسودٍ يبهر العين
محدٍ يحج ويعتمر مابدابه
سعد بن مويزر البدراني - الرس
*****************
ياللي على مكه لفيتوا ملبين
عند الحجر لاتكثرون النشابه
لاصار دونه ضيق والناس حشرين
يكفي سلام البعد ياصل جنابه
شماس عبدالله الشماس- عنيزة
*****************
اهلاً هلا مافاح ورد البساتين
واعداد من زار الحرم أو سعابه
وترى الرفيق اللي رفع شأنه الدين
ذاك الحجر الأسود عزير جنابه
هندي بن نابت الغياثان - الافلاج
*****************
ياهل الوفا ياهل المروات والدين
يالابتي لايا بعد كل لابه
الخيل يعرف طيبها بالميادين
والحر ميقاعه بعالي هضابه
والحجر الأسود دون وحده وثنتين
ياللي كتبت اللغز هذا جوابه
بدر حمد الوشيل- الزلفي
*****************
يامرحبا والناس للناس وافين
حتى ولو مابين أهلهم قرابه
يابن عطاالله ياصعوط المجانين
يالشاعر اللي مابلغزك عيابه
ينشاف واضح شوفة الشمس بالعين
الحجر الأسود لا كشفنا حجابه
محمد علي الوشيل- الزلفي
*****************
يامرحبا اعداد نبت البساتين
واعداد نبت الروض وأيضا اهضابه
بالشاعر اللي يعرف الزين والشين
عبر التراث أهلاً بحضرة جنابه
واللغز واضح مايبي زود تخمين
)الحجر الأسود( كان تبغى الإجابه
عبدالله بن حمد البدر - الزلفي
*****************
اهلا هلابك ياعطاالله وسهلين
عد البرد واعداد وبل السحابه
نفس التحية نرسله للمعدين
واللي قرا تسعين يا مرحبابه
اللغز ماله يابن الأجواد مثلين
هو الحجر معروف ماله مشابه
خالد سليمان الجريش - الرياض
*****************
ياهل الوفاء بالقول والفعل وافين
نقولها بالوجه والاّكتابه
ياالله تكتبنا حجيجٍ ملبين
ياواحدٍ نرجي عطاه وثوابه
حتى نطوف البيت ونشوف بالعين
حب الحجر لو هو صعيب إقترابه
محمد علي السالمي رفحاء
*****************
مبداي باللي خالق الإنس من طين
ثم صوّره واعطاه عقلٍ زهابه
وارسل تحيه عِطّرت بالرياحين
من ابن صاحب عد وبل السحابه
للشاعر اللي عارف الحكم بالدين
إن)الحجر الاسود( يقبَّل ندابه
علي بن صاحب العمري
*****************
بامرحبا باللي نشر لغزنا الزين
يسلم عطاالله ولِّفه ثم جابه
أهل التراث اللي لنادوم وافين
من كل لونٍ ظاهرٍ بالكتابه
اللي يطوف ايشاهد الناس بالعين
عند)الحجر( والشوط كل بدابه
علي رشيد الرشيد - رياض الخبراء
*****************
أهلاً هلا وعداد فوجٍ ملبين
وسط الحرم وعداد رش السحابه
بالشاعر اللي يرفع الراس والعين
ويهتم في قول النبي والصحابه
وينشد عن اللي ما يحبونه أثنين
ذاك الحجر إن كان صبت الإجابه
كريم عيسى العنزي - الخرج
*****************
يامرحباً الفين والفين والفين
اعداد ماهل المطر من سحابه
باللي كتب له في الجزيرة عناوين
عبر التراث اللي بلدنا بدابه
وانا لقيت الحل من دون تخمين
هو الحجر لسود صحيح الإجابه
مسفر فهيد السبيعي - الأحساء
*****************
أحسنت حبك اللغز وصف وتبيين
ماهوب لغز البعض مافيه ثابه
مسكين ياللي تطرد اللغز مسكين
اللغز ذوق وفن وأيضا وهابه
واعطيك حل اللغز ماهوب تخمين
ترى الحجر في بيت ربي جوابه
فهد الحزاب - الرس
*****************
يابن سليمان العطاالله لكم دِين
وامثالكم يستاهلون الكتابه
أقولها هالحين وباكر وبعدين
واللي حسدكم ماحسبنا حسابه
من بعد ذا يا للي تحبون مقدين
ذاك الحجر يالابةٍ خوش لابه
حجي بن سليمان الحجي - الأحساء
*****************
الحل واضح مايبي اليوم تخمين
ولابن عطاالله مرسلين جوابه
هذا الحجر ياماله الناس عانين
ولبيت ربي طالبين ثوابه
وياما نفوس يمه اليوم ماشين
واللي يحب الخير ياخذ نصابه
محمد بن عبدالعزيز الخنيفر - أشيقر
*****************
باسم الذي نزل تبارك وياسين
اللي حما بيته وعزز جنابه
اللغز ماظنه يبي زود تخمين
ترا«الحجر الأسود» صحيح الإجابة
حميد بن محسن آل مسرع - وادي الدواسر
*****************
لغز قريته بالجزيرة ومن حين
من حين ما خلصت قلت الإجابه
واللغز واضع مايبي شلون.. بعدين
من شاعرٍ خطه وثم اعتنابه
الحجر الأسود والحقيقة تبي تبين
صوبتها وعساي أجدت الإصابه