ظلام الحزن

الحزن عسعس ظلامه وأرهب السكة
وأسرج لي العاديات اللي معه يعدن
بابنٍ فتح للهموم أزريت لاصكه
من واهجن بالضماير يصهر المعدن
مزنٍ نشا بالدموع وخاطري تكه
واللي جنى الجنتين اليوم ما يجدن
توجهوا قاصدين البيت في مكه
وأنا سحايب دموعي سيّلت لندن
البون شاسع وربي ما بها شكه
والله يالايام وش يخفن ووش يبدن
يا هاجسي لا بكيت من العنا بكه
مشاعري لو بقن بالقطب ما بردن
الجودي اللي رسى والهول ما دكه
عليه ساير مجاهيم العنا وردن
الهم غربه يا جودي ما منه فكه
وهذي مواري طيوره بالهوا يشدن
الله واكبر كبيرا والهوا مكه
والحمد لله كثيرا والعنا لندن