زهور الحدايق

يا مساء الزعفران وما حواه
يا بياض الحرف في النص الأجدّ
«شمعدانك» لو بغيت اكتب ضياه
ما لقيت من الحروف اية مدد
حبتك في الله سجادة صلاه
تصعد ب..أطهر جبينك لا سجد
ان لفيت بهمّ شفته في الحياه
عوذتني بالفلق والله احد
ذكر ربي دايم ٍ بين الشفاه
كنّه إلا الدم في مجرى الجسد
امتلكتي عطر لو وزع شذاه
عاشت زهور الحدايق في كبد
السهر / الطيش / تأديب العصاه
خلت الرجال يكبر في الولد
الشعر امي في سدرة منتهاه
وش بعدها علموني وش بعد؟!
آآه يا مشرق حياتي...آآه آآه
غربتي عنك اجاهدها جهد
طفلك اللي تخبرينه في صباه
صار يرسم للعصافير الوعد
صار ينشد اغنياته لأصدقاه
والزمن يعزف على سلم سهد
صار يمشي عالق الهم فرداه
والليالي كنها حبل ٍ مسد
يا أمل في طاعته حلم النجاه
دعوتك للطفل باب ٍ للسعد
اطلب اللي صبّر ايوب ف..بلاه
يحفظك من شر حاسد لا حسد