صوت الوصل

مقدر أكذب عليك ولا تكذبني
الحب أكبر من جروحي وتفكيرك
شرقت للحب يوم الوقت غربني
مشيت لك بس طالت بي مشاويرك
عناني الشوق والمشوار تعبني
أضماني البعد وعيوني على بيرك
لو أن لك قلب يقراني ويكتبني
ما كان هذا نصيبي من مقاديرك
أجر صوت الوصل والبعد جاوبني
البعد صوته حرمني من معاذيرك
ما عاد به شي من فرقاك يطربني
إلا قصيدٍ كتبته علّه يثيرك
حاسب ضميرك حبيبي لا تحاسبني
وان كنت صادق يبين من تعابيرك
ما قصر الوقت سوابي وعذبني
من حزن الأيام جيتك الله يجيرك
يا لعنبو غيرك أسكت لا تعاتبني
أنا خسرت الكثير ولا بقى غيرك