النصيحة

لا صرت محتاج النصيحة لجل تنهي المشكلة
لا تستمع للي غرق تحت المشاكل لين مل
لو هو صحيح انه يفيد اللي يشور ويسأله
كان استطاع انه يشوف لمشكلاته كود حل
التجربة اللي تعتمد في خوض عمق المسألة
من خبرته يقدر يغيّر عن مسارِ فيه غل
وش جاب راعي الكهربا صوب الذهب والبوصلة
كل حسب سير اختصاصه يعرف اللي فيه زل
من باب فرق المستوى كل تحدد منزله
الناس معدنها تفاوت ... ناس زاد وناس قل
لا تنتظر فزعة ردي النفس وقت البلبلة
ولا تلتفت للي عطا ثم فالهدايا عاد ذل
وان شفت حاجة تزعجك انهي القلق من اوله
فجأة تلاقي لك ضرر ما يندرى من وين هل
خلك سخي واحسب حسابك للسنين المقبلة
من عاش في وحل البخل مات بفقر والمال ول
الواعي اللي منتبه هو من بني مستقبله
مهما ظروفه عكرت في صحوة الاحلام ضل
ماهوب عيب ولا خطا نسأل سؤال نجهله
لك بالذي ضيّع طريق السير ثم بالشور دل
يا صاحبي وان بهذلك فالحل بُعد المشكلة
اعرف ترى قد قيل ما به مشكلة من غير حل
اصبر على ضيم الزمان اللي طغى واتحمله
اليوم الاقشر عاند اللي من جحود الوقت كل