الشاعر حزين ...

حزين اكثر من العاده
حزين الليله بزياده
حزين وخايف ومحبط
حزين كثير وملخبط
حزين حزن لا صادق ولا كذاب
حزين واجهل الاسباب
اه
ادرى والله ان اللغه
ام المشاعر
بس اللغه
اصغر كثير من الحزن
لما الحزين يكون شاعر؟
في الحزين من الكلام
يغفى سربٍ من حمامٍ
او قطا
في الحزين من الكلام
وده العاشق ينام
الله لو يلقى غطا
ما بقى خلٍ وفى الا ومات
وفتشوا في الذكريات
عن حبيبٍ لا مقيم ولا مهاجر
مثلما دمعٍ عتيقٍ حايرٍ
وسط المحاجر
عن حضن دافي رحيم
عن كريم
واسالوا الاربع جهات
يا ترى
يا ترى وشلون مات
بعذري اليله اهذري
وان سالني سائلٍ باقول مدري
واقفل الابواب
ادخل غرفتي
اقرا الحزين من الكلام بدفتري
واهمس بنفسي
ما عليه
وان حصل لي
باحضن جدارٍ قديمٍ يرتجف
لا ارتسم ظلك عليه
يا للى كنتي: تخبزين الحلم قرصٍ ساخنٍ
وتقدميه
كل ما خاطر من خواطرنا انكسر
كنتي دائم تجبريه
اقرا الحزين من الكلام بدفتري
واهمس بنفسي ما عليه.
والله يا لولا عجوزٍ وشايب
وبنتٍ أخاف تضيع لا مات ابوها
اني لا اسوى العجائب
التفت حولي ولاني
حزينٍ مرتبك محتار
مدري وش اسوي
اطوي الحزين من الكلام بدفتري
وأهمس بنفسي
ما عليه