اسأليني ...

أيوه عاوزك تسأليني
اسأليني بس عاوزك
لو حاجاوبك تسمعيني
اسأليني ليه بحبك
اسألي حايرد قلبك
اسألي وانا مش حاجاوبك
أصلي حابب تظلميني
اسألي بس في سؤالك
نفسي مرّة تفهميني
**
اسأليني وعاتبي فيّا
خلي قلبي يدوب شوية
خلّي قلبي يقول بحبك
آه بحبك صدقيني
آه بحبك بس عارفة
مهما اقول حا تكذبيني...!
مهما اقولك ألف كلمة حب
برضو حا ترفضيني
أصلي عارفك أيوه عارفك
مش حا ترضي غير ده لمّا تعذبيني
**
بس عارفة نفسي اقولك
كلمة يمكن لمّا أقولها حاتعرفيني
تعرفي قلبي اللي حبك
وذاب في حبك طول سنيني
تعرفي عمري اللي جنبك
كان ده قبلك مش لاقيني
كلمة كانت نفسي اقولها
لمّا جت عينك في عيني
كلمة يمكن لو حاقولها
بس اقولها حاتبوسيني
**
بس لا ... أيوه خايف
لو أقولها وتسيبيني
يبقى ضاع حلمي اللي عشته
واختفت من جوه عيني
صورتك اللي كنت اشوفها
وهي ّ جاية بتناديني
صورتك اللي صحيح عارفها
مش خيال مر ونسيني
يبقى لا أيوه لا
مش حاقولها وحتى لو حاتموتيني!
وخلّي حبي ليكي حابسو
وخلّي بحر الشوق ماليني
أصل حبي ده ليكي قصة
ومش حوار بينك وبيني
مش دة كلمة حاقولها واسمع
ردها لو يوم يجيني
في قلب خايف لو قابلتو...
مش بعيد الاقيه نسيني
يبقى آخر كلمة بينّا
لا اسألك ولا تسأليني