ذبيح الحب

طحت بإيده وآتصدد وآتباهى بالجموح
حايره بالحيل وادري دقّة الخفّاق «مِيح»
كل ما هدّيت بيتٍ عَمّرَت عقبه صروح
كل ما قوّيت قلبي ألمحه – فجأة – يسيح!
وين أخبّي هالمشاعر والمشاعر بي تنوح؟
ربكة الأيام تلفت كل شخصٍ مستريح
خايفه أبعد وينسى.. خايفه أقرب.. يروح
خايفه أجلس ويقسى.. خايفه أوقف وأطيح!
خايفه والله أضيع وتنهش ايديني جروح
خايفه أعلن جنوني.. خايفه أسكت وأصيح!
وين ما لدّيت ألقى للذكاء أحلى شروح
«كل من جاني يداوي.. طاح بأسبابي جريح»
حارت الأيام فيني حارت ب..هالروح روح
وامتلى صدر الغمامة «يا هلي» بأوجاع ريح
من هنا بيت القصيدة يشتكي ودّه يبوح
يرتجي طير المعاني في غنا لحن الفصيح:
كَيفَ لي اُبدِي شُعُوراً كَانَ للصَمْتِ طَمُوح؟
كَيفَ لي أُخفِي نَحيباً هدّه الشوقُ طَرِيح؟
ذلكَ المَجنونُ بَانت فِي خَوَافيهِ قرُوح
كيفَ لي أَنجو بقلبي وهوَ بالحبِّ ذبيح؟!