عيدية الشعر

سلام رديّة وفاياذيب وأمن العايدين
مثلك تشرفنا مراسيلة ونرقب جيته
يا ثالث العيدين طيبك في رقاب الناس دين
الطيب له قدسيته والعيد له قدسيته
و أن كان فزّت لك بنات الشعر بالقاف السمين
عايدك قبل العيد عيد الشعر يا عيديته
لو غبت عني عام والا شهر والا جمعتين
ذكرك يباريني و حبك ما فقد شرعيته
مواقفك ما خاتمتها بين جيم وبين سين
يعدها التاريخ و التاريخ له حتميته
قاضي عدل ويصدّر أحكامه من أصل وصورتين
و موظف الارشيف شال الصك في دوسيته
وثيقت(ن) نرجع لها ذا الحين والا بعد حين
مضمونها أنك كفو في عدل الزمان وليته
و اللي عطاها الله أخو ما جابه أحد الوالدين
ما خاف من غدر الزمان اليا قلب طاقيته
هذاك أنا .. وأنت الأخو .. ولا عزا للحاسدين
و الرجل يختار الرجال اللي على سجيته
و ماكل من عنده يا راس الطيب دقن وشاربين
يعد من ضمن الرجال وتحترم شخصيته
كم واحد(ن) يعد نفسه من حساب الواردين
و اليا نخيته يتقي من فيته في فيته
بخيل متلون عديم أحساس بارد ساعدين
تبلش معه في فرقة أقرابه وفي قطيته
مهما عطيته درس في النخوة وبر الاقربين
النصح ما فاد القلوب الغافلات الميته
الشمس لو غابت ثلاث أيام فالرابع تبين
والناس تعرف قرب ليل العيد من عصريته
و أنا طويت رشاي عن تبع الرخم والتافهين
و الأبرق اللي يختلط مزحه مع جديته
أمشي قدم و أداحم العالم وأنا جنبي متين
و أشد فيك الازر والحوثي مع حوثيته
هذي رسالة عيد صادتها هجوسي في كمين
و سرابها قافي و أنا سريت مع قافيته
أن كان فيها ما يسمى شعر رد بكلمتين
والا أطلب الشاعر وصادر قافه وجنسيته