تبغاها من جد .. تصير جدة ( غير) !! (5)

د. هاشم بن عبد السلام بن محمد جمعة
وبعدين تعال هنا: دا إللي ساكن جنب التحلية ما بتوصولوا الموية،أجل الأبراج هذي من فين هاجيبوا مويتها؟ ياسيدي البرج دا مخطط كامل بس واقفلك عامودي على وصلة أرض أبو 1000م!! قبل ما تفكر في شوارع ومساجد، أو مدارس للأولاد والبنات تكفي إللي رايحين يسكنوا فيها، فكر كمان في هوا ربنا إل إنحجب عن باقي جدة، والبيوت إللي انكشفت سترتها بين يوم وليلة، واللي طبعا إرتفع سعرها، وبكرة تنباع هذي الفلل والقصور ونلقى مكانها أبراج، وثالث ورابع.. وتبغاها من جد تصير جدة؟!
إبغاك تمسك صورة لجدة قبل عشرين سنة، وتقارنها مثلاً بصورة دبي في نفس السنة، فين كانوا وفين كنا، بس قعدنا نقول جدة غير جدة غير إلين صدقنا من جد ووقفنا محلك سر، والعالم كلهم أتخطونا، وأي واحد يكلمك اليوم يفتح عيونوا فيك ويقولك: "تبغاها تصير زي دبي، ماشاء الله الأبراج في كل مكان وعمران له أول ماله آخر". وأبشرك .. صارت الأبراج الى هنا نسخ طبق الأصل من إلى هناك.. والله ماكلفوا نفسهم حتى يغيروا خط في تصاميمها .. كانها ناسبتهم حتى تناسبنا.. عجبي !!