غشتك نظرتك

غشتك نظرتك وإلا الناس غشوك=أصحاب منت امتوقع منهم الغش
حيّوا وصبوا لك الدله وعشوك=الثغر لك مبتسم والوجه لك بش
وعقب الكرامة بغالي الطيب رشوك=ماتسمع إلا هلا بالطش والرش
ومن يوم ودعت عند الباب حشوك=غفله وظنوك منت بسامع الحش
لكن كلامٍ سمعته كنه الشوك=وإلا اشتعال الشرار بيابس القش
شيٍ يقول إمش دام الناس مشوك=وشيٍ يقلّك تفك الباب وتخش
تشعل عليهم لهيبٍ فيه طشوك=وتهدم عليهم جدار الصحبة الهش
لكن يقول العقل مادام عشوك=إن كان تقدر تمشيها لهم مش