أحبه

شعر- طلال الطرقي
يقولون مع غيره تبي تسلا وتنساه
وأنا والله إن أموت ماغاب عن بالي
في زوله وفي زينه وفي مبسمه وحكاه
متيم وهايم به ولو ما تهيالي
أحبه وحبي له تعدى حدود ال آه
ليَّ مرني طيفه وأنا جالس لحالي
سقى الله زمانٍ كنت بالوصل أنا وياه
تطيح البشر من عيني لا شفته قبالي
تعذر وودعني وقفّى يجر خطاه
وياثقلها لا اقفيت عن واحدٍ غالي
عسى الله يصبرني ولا شي أبد يخفاه
وهو عالمٍ فرقاه وش سوى بحالي
ومن قال أبسلا بعد ماذقت أنا فرقاه
ماشاف دمع(ن) محرق الخد همالي
عليّ أهون إن أعيش عمري على ذكراه
ولا أحب أحد غيره ولو كان يسعى لي