ملامح زمن

"ملامح زمن" نص شعري جديد للشاعر المتميز والناقد البارع سعود الصاعدي خص به (شموس) ومثل هذا النص الفارع تعجز كل المفردات عن تقديمه لذلك لا نملك الا ان نشكر شاعرنا (ابا خالد) على ثقته وحرصه وندعوكم لمشاركتنا قراءة قصيدته:
بلا طعم الكلام اما صحا قبل انبلاج النور=وولع في فتيل الليل صبح وسبح الباري
هلا يا دارنا اللي فيك ماضي عمرنا محفور=هلا.. لعيونك الليلة بشب الحان مزماري
لياشفتك ملامح من بقايا ضحكنا المهجور=رفعت الصوت من قلب يهز بنبضه اوتاري
تموت اخر عناقيد العنب لاسافر الناطور=وتبلع وحشة الدرب المسافر خطوة الساري
سنين معلقة باهدابنا يوم الشهور شهور=تنادمنا لياليها فرح والحزن متواري
وجيت اليوم افتش في ثراها والمشاعر بور=واهز غصونها فالذاكرة وانشد عن اخباري؟
حزينة كنها عاشت دهور وقلبها مكسور=تشوف عروقها تنزف صداها والجسد عاري
وبحت ولاقيت الا كلام بارد مكرور=تعاقبه الرياح الهوج لامن جابه الطاري
وانا طبعي مزاجه كلما صحيت في شعور=يلبسني ثياب جداد والا يدفن اشعاري
يبي ورقا غصون وصبح باهداب الندى منثور=وصوت لارقا سمع الزمان يجدد أفكاري