خواطر من فوق السحاب

هناء عصام
الراجل بتاع التوحيد والنور راح طبع علم مصر على نعل الجزم اللى بيبعها ف محلاته.. قاموا قابضين عليه بتهمه اهانة علم مصر !! انا بحس الرجل ده بالذات بيقعد يقدح زناد فكره كل يوم قبل ما ينام يعمل مصيبة اييييه عشان يتسجن !! لا و كل بلوه و التانية مبتكره عن اللى قبلها !! الرجل ده لازم يحترف بره
*** ***
يا جماعة بالنسبة لموضوع تعيين رئيس مخابرات جديد فيه حد لسه مقالش رأيه عشان هنشطب ؟ الاخ اللي هناك يحب يفتي؟ الاخت اللي ورا تحب تتفلسف؟ انا مش عارفة السيسى ازاى معملش اجتماع ع الهوا زى بتاع سد النهضة كده يشركنا فيه كلنا ف اتخاذ قرار زى ده !! طب بلاش ..هااااال اخد رأينا ف سفرية الصين دى ؟ طب ليه مش الهند ؟ و ليه مش موزمبيق ؟ لا لا كده كتير ..فين الشفافية ؟ فين المشاركة ؟ فين الترامادول ؟ هو مايعرفش اننا و بلا فشخرة عندنا 90 مليون خبير امنى ..خبير استراتيجى ..خبير اقتصادى ..خبير سياسى ..خبير مخابراتى الخ !! يعنى تلت خوابير العالم و برضه بياخد قرارات لوحده ! عجبت لك اسيسى
*** ***
اهو بحكم العشم لسه بنزعل
و بحكم العشرة بنعمل مش واخدين بالنا وبنكابر
بس شوية كده و كل ده هيروح لحاله
مين بيعمل لأى حاجة دلوقتى خاطر
*وجع
معلش !! جبر الخواطر ....على الله
إعلامية بالتلفزيون المصري