توافيق

سبحان الله، إدارات الأندية توافيق، أحيانا تكون إدارة النادي هي سبب كحش البطولات، وأحيانا تكون سببا مباشرا للدجة والدحدرة، والإدارة اللي ما تعرف تتعامل مع نجوم الكورة انس إن النادي راح يجيب بطولات، النجم لا صرت تعرف أنه نجم لازم تصبر عليه، لا ترفع خشمك عليه، لا تضغط عليه وكل ما لعب مباراة ولا جاب قول سميت بدنه بكلمتين، ما نبي نطول بهالسالفة اللي ياما عدنا وزدنا فيها لين ملينا، واقرد لاعبين بالدنيا هم اللي يلعبون راس حربة، الله يعينهم؛ لأن نجوميتهم ما راح تفيدهم إذا كان يلعبون بنادي لاعبين الوسط فيه داجين، جب اطلق هجوم وحطه يراكض بدون لاعبين وسط يفهمون كورة، راح يراكض لين ييبس حلقه، راس الحربة مو مثل أي لاعب ثاني يعني ما يقدر يترك خانته عشان يرجع وياخذ كورة، تذكرون قبل سنين أظن عام 95 جلس سامي الجابر موسم كامل ما جاب يمكن غير هدفين أو ثلاثة لدرجة أن جمهور الهلال كان يصرخ بصوت واحد ضد سامي، لكن قدام الأهلي حسمها سامي وجاب للهلال البطولة، ريال مدريد قبل سنتين صبر على راؤؤل كونزاليس موسم كامل والحين انتم شايفين وش يسوي مع ناديه، بعض إدارات الأندية يحذرون جماهيرهم من التأثر بكلام الصحافة وهم أول من يتأثر بكلام الصحافة المضادة.