افصلوا الخدمة احسن!

قد جربت تسوي خدمة لاحد وندمت على هالشي؟ أخوكم في الله يعترف بهالشي وياليت الاخ اللي محتريني اخدمه يكون «على السمع» ويقرا هالكلام.. إيه انت اجل اعني خالتي؟ أحب اقول لك من هالمنبر ان الخدمة اللي انت طالبها ما لها دخل باختصاصي واني ساعي لك فيها ومحرج نفسي مع عالم ما امون عليهم، وكله عشان خاطر جناب خشتك اللي ما ادري من وين طلعت لي.. وبعد كل هذا موب عاجبك وتتضايق وتحسسني اني مقصر وان الحل والربط بيدي.. واحلى شي في الموضوع مسوي تعتب وتشره وانا اصلا توي متعرف عليك قبل امس، وعلى حظي من عقبها صرت كل ما اروح مكان تطلع لي، وكل ما تطلع لي تغثني: وش صار على موضوعنا؟ طبعا هذا يختلف عن خوينا الثاني اللي قابلته في مغسلة ملابس وسولفنا خمس دقائق وطلب خلالها 15 خدمة في مجالات التعليم والصحة والسكن والأعمال، اجل لو شايفه في قصر افراح وش كان طلب!
شركة الكهربا الموقرة ما لها دخل في الكلام اللي راح، لكن ممكن احتاجها ترسل مندوب عشان يقيس حجم اسلاك الذوق المفصولة عند هذولي البشر، لعل وعسى يرجع لهم تيار الحيا ويستحون من انفسهم شوي، لأن عداد النوايا الطيبة عندي بيضرب من هالاستغلاليين وما لها داعي ادفع فاتورة أغلى من اللازم، تدرون عاد انا اطالب ب «فصل الخدمة» احسن.