نعم والله يا نايف

ألا يا مغادر الدنيا
وتاركها مثل ما يحلم الحلمان
قصيرة في مسافة رحلة الأزمان
يا نايف
ألا يا مهاجر الأحباب
وتاركهم مثل ما هم
يبذرون المحبه وين ما هم راحوا
حديقه مثمره بالطيب والعشرة السعودية
والرحمه والإحسان
والحب الذي وين ما انتشر يكسر يد الشيطان
يا نايف
يا برق الطيب هاللي في الأماني
زرعت اخضر على طول العمر هاللي
مثل قلب الطفل عشته
وخليت الليالي بحور تشهق بالذهب والدان
وخليت الصحاري نخيل تتنفس منارة
كل هل الايمان
يا نايف
سويت الذي تقدر
بنيت احلام ما تحصى ولا تنعد
فتحت النور وخليته بلا بيبان
وقلت للغير رحموا كل اهالي الارض
من مسكين أو مغبون
وكل جايع وكل عاري وكل عطشان
وتدري انته جزا الإحسان في الدنيا
دعاوي خير في كل كلمه ينطقها صدر ولسان
وفي انوار ارض العالم الآخر
عشر أضعاف من الإحسان
يا نايف
ترى الارض السعوديه
أبد ما تنسى من خضّر براريها
وحولها مئة بستان
وكل واحد تبع شورك
عرف من انت
عرف ان الرجل موقف
وكل موقف وقفته في بحر عمرك
يذكرونه السعوديين ويذكرونه الخليجيين
ويذكرونه العرب كلهم وكبار الأمم..
والله ربيع اسمك غدى حق العرب عنوان
يا نايف
إذا الواحد عرف ان الذي يولد
عقب عمرٍ قصير أو طويلٍ للقبر رايح
نعم والله يا نايف
جميع اللي اسمعوا صوتك
وتنوّر ضواهم من ضوا فعلك
يذكرونك مثل ما تذكر الدنيا
اسم كل من عمل صالح
وحوّل للعذوبه كل بحر مالح
ومن مثلك حياته نجوم ويا اقمار
يبقى في ظلام الوقت اسمه في الصدر عالي
وفي صبح المواقف يرتفع ويبان
يا نايف
يا انسان في قلبه محبة كل اسم مخلوق
وكل نخله وكل شارع
وكل مبنى ارتفع في سكه او فرجان
باذن الله لك الرحمه وباذن الله لك الرحمه
لك الأرض الوسيعه ف جنة الرحمان
ولكل اهلك وكل ارضك ومن حبك ومن ودك
لهم باقي العمر كل مغفره وسلوان
يا نايف
وتدري انته في هالدنيا كل شي فان
ما يبقى سوى الرحمان
ما يبقى سوى الرحمان.
* شاعر بحريني