الشعب ينعم والحكومة رشيدة

تباشري بالخير يادار الاخيار
الشعب ينعم والحكومة رشيده
تفاخري يادارنا سر وجهار
منبع وحي واللي يحكمك وليده
خيره على شعبه مثل وبل الامطار
يمنى كريمه والشجاعة رصيده
زعيم ما مثله حكم بين الاقطار
يفخر بشعبه وامنياته بعيده
صقر العروبة مبهر كل الانظار
في كل يوم ومكرماته جديده
الطف على شعبه من الوالد البار
الجود قمة وأبو متعب حفيده
حبه لشعبه ما سمع فيه بوار
يجري بمجرا الدم داخل وريده
من راس أبو تركي ومن طلع سنجار
رمز الشجاعة والكرم سيد سيده
يادار غني له وفا عشق يادار
غني في أبو متعب تزين القصيده
يادار في عينه تباهي بالانوار
زيدي لبو متعب عسى الله يزيده
صميدع ماخلق مثله ولا صار
تسامحه عم النفوس الحقيده
عطفه شمل من خططوا له بالاشرار
حتى عداه من العفو مستفيده
وإن كبرت القولات بيمين ويسار
الكايدة والمعضلة ما تكيده
حكمة وقوة والشجاعة لها ادوار
يقود شعبه وأبو خالد عضيده
ولي عهد المملكة واف الاشبار
سلطان لا قام الضديد لضديده
يعرف بوقفاته مع فزعة الجار
يوم الكويت مذير من حديده
وقف وشال الحمل قنطار قنطار
رجل الشدايد فالسنين الشديده
والعذر منكم ياطويلين الاعمار
وفاكم أكبر من بيوت القصيده
أنتم هل الطولات وأنتم هل الكار
وأهل الفعول الثابتات الأكيده
من دون طيبة والحرم درع واسوار
بالعروة الوثقى سيوف حديده
شبه الجزيرة تنعم بخير الاخيار
عمار يادار الشرف والعقيده
وامجار ياللي مكرم شعبك مجار
الله يمتعك الحياة السعيده
والله يحفظك عن صواديف الاقدار
وعسا حياتك يابو متعب مديده
آمين يامولاي علام الاسرار
تحفظ ملكنا والقيادة رشيده
عبد الله بن راجس