رحيل سعود

ارحل عداك اللوم واشهر وغادر
مالك مكان إلا على عرش الاذكار
ارحل رحيل ابوك للمجد ثاير
مكانك التاريخ يابر الابرار
ارحل على هامات الايام طاير
في موكب الافلاك بالعز سيار
ارحل وللعدوان كسر الخواطر
شافوا الوطن سجل لك المجد تذكار
وداع يا باقي الرجال النوادر
اللي لهم بالنايبه موقف وكار
وداع يا صوتٍ يهز المنابر
نجم السياسة والمحافل والاخبار
وداع يا اللي كل ما حار حاير
تلفتت يمه مطاليب الاشوار
وداع يا اللي عانقته الضماير
حبوه خلق الله كبيرين وصغار
خلدت اسمك ما رضيت الصغاير
وتركت عابرها لشهوات الاصفار
ثروة حياتك جمعتها الحناجر
حب وتقدير وتعظيم وكبار
ناس مظاهر شي وناس مخابر
والشاهد الله انك خيار الاخيار
شمس غشاها اليوم دونك غباير
خليتنا يا سعود والوقت غبار
يا عين اخوك اللي ترد العباير
حبستها والدمع للعين غدار
يقولها اللي بالمواجيع خابر
رجل على صكات الايام صبار