هذا أنا والليل

وعلوم المشاعر والبدر
كلنا جينا ( مشاعل ) يا عسى ليلك ابخير
واحمد الله يوم هالأوجاع ما راحت هدر
شف بعد ما طارت هْمومي من الفرحه ب اطير
استلذ بطيب قلبٍ في هوى قلبك قدر
وانتثر كثر الخطاوي لو يطول بْها المسير
وآه من دمع الفرح يوم انتخى بي وانحدر
ما ذكرت إلا هدايا العيد في عين الفقير
يا رجاي اللي ذخرته حلم في ليلة قدر
ويا الحياة اللي بعيني بعد تحديد المصير
كل جرحٍ بالمودة لو من احساسك بدر
ادري انَه دون قصد وادري ان القصد غير
والشحوب اللي بوجهي سافر الا ما ندر
يحتري طلة بقايا النور والحلم الكبير
من هو اللي قد لمح طرفي من اللهفه خدر
غير طرفك والمرايه والظلام المستنير
أقبل وإقبل كلامي فيك من عقل وصدر
انك الغالي وربي لو يصير اللي يصير