بيت وصدى

الاسبوع الماضي كان بيت الاسبوع عن مقترح الاخ علي الدهري حول عدم وجود تأمين طبي لموظفي الخدمة المدنية للشاعر حامد الغالي والذي يقول:
ليه الموظف ما له اليوم تأمين
راح المرتب للمشافي رهينه
وكان الصدى من الشعراء
لي جيت مستوصف تبي قطرة العين
سعره على ولد البلد زايدينه
حديد امًّن والبشر غير تأمين
ليه التهاون يالعقول الفطينة
سعود بن عبدالعزيز الهزاع
والناس تعرف مصدر الزين والشين
كم واحد يطمح لامور سمينه
الله يجيب الخير ويقوي الدين
والله يعين اللي يقود السفينه
الله يعين اللي عليه الملايين
نطلب عسى المولى بفضله يعينه
علي رشيد الرشيد
حد الموظف بالعمل لين ستين
طول الدهر يعمل ومثل المكينه
متحمل وقته على العسر واللين
صابر على العسرات ربك يعينه
طبه على كيسه موظف ومسكين
تأمين طبي ماله اليوم عينه
عبدالمحسن بن محمد المحيسن
لازم بنظرة عاجلة يالعزيزين
لأجل الموظف واجب(ن) من يعينه
هذي رسالة للرجال الفهيمين
لرجل(ن) من الإخلاص أمضى سنينه
وبعض المشافي تستغل المساكين
من دون رحمة ذي فعول(ن) مهينه
ريان محمد الخنيفر
ترى الموظف خادم حد ستين
اخلاص لكن ماتفيده سنينه
باول شبابه كابد العسر واللين
يتعب لاجل رزق تحوشه يمينه
واللي يعالج ماخذ زود قرضين
لااحد سمع شكواه ولاأنينه
حمد عبدالله الوايلي
صار الموظف في متاهات بعدين
بين الامل واليأس يالله تعينه
والله مصيبه تدمي القلب والعين
ما فيه تأمين يعوض سنينه
من حقه التأمين بالعسر واللين
والحل عند اللي يقود السفينه
علي ال زولان الفيفي
بيت الاسبوع
تجاوبا مع مقترح الأخ عبدالعزيز الصقير لموضوع بيت الاسبوع القادم وهو ضرورة وضع تسعيرة على المواد الغذائية أسوة بتسعيرة الادوية ارسل للصفحه الشاعر ابراهيم بن راشد المغيره من ضرما هذا البيت
وين الرقابه ياجماعه للاسعار
كل على كيفه يبيع البضاعه
نستقبل صدى هذا البيت بثلاثة أبيات فقط تدور حول هذه القضية الهامة ووجوب تحديد هذه الاسعار باستيكرات للاسعار
ويفضل الإرسال عبر الإيميل rb-khozama@alriyadh.com
او على الفاكس (4871070/ 01)
مقترح لموضوع بيت الأسبوع المقبل
ارسل الاخ جزاع الشريهي موضوعا لبيت الاسبوع القادم وهو ضرورة إبعاد مصانع الجبس والاسمنت والكسارات عن ضواحي المدن حفاظا على عدم تلوث جو المدن وسلامة صحة المواطنين.