يا زين شوف المطر والمزن همالي

والبرق نوضه يشع ابمقدم اخياله
غيثٍ من المزن هل بقدرة الوالي
سبحان ربٍ عظيم الشان نلجا له
امطار رحمه وسقيا مزنهم عالي
سحايب الخير بالخيرات هماله
يحن قلبك علي المكشات طوالي
والبر شوفه جميع الناس تسعى له
في روضةٍ عشبها جايله اظلالي
عشبٍ جديدٍ وتوّه ماحدٍ جاله
فيه النواوير زهى بحلو الاشكالي
يفوح فيها النفل يوم الحيا طاله
والطير صوته شجي لا طار بالعالي
من فرحته بالمطر بالصوت غنى له
تبعد عن اهل القشر والقيل والقالي
وترافق اللي تنومس طيبت افعاله
خوّة رفيقٍ تعزّه باول وتالي
لا زاد حمل الزمن عن ساعدك شاله
سجّه وفلّة حجاج وضحك متوالي
والنار تحت الدلال الصفر شعّاله
جوٍ بديعٍ وشوفه يشرح البالي
يشفي عليل الصدر لا زاد غرباله
هذي حلات العمر مهما الزمن طالي
تنسى هموم الزمان وجور مد هاله
محمد مرزوق السميري