قسوة العمر

الصبر طال.. وطال عمر المسافات
وازريت لاعرف وجهتي واتجاهي
ما كنّي الا عايشٍ في متاهات
والعقل من كثر الغرابيل ساهي
اسج مع طاري الفرح والمسرات
واعيش طعم الحزن عند انتباهي!!
ضيقة صدر مرّت على كل الاوقات
كن الفرح عن جيّت القلب لاهي
ما غير اسابق لهفة الشوق بسكات
والشوق لشعور الفرح صار ناهي
وانا لو اني عشت دنيا الملذات
ماعشتها بالغطرسه والتباهي
لكن على الله يا زمن فايتٍ فات
ما رحت ادوّر بالذنوب الملاهي
صابر واكابر واتحايل على الذات
واحاول ارسم بسمتي في شفاهي
ويبان من حزني عليّه علامات
يا هي عظيمه قسوة العمر.. يا هي
عادل بن سليمان المخلفي