ازريت أعرف الوقت برده وحره

يامل عينن دمعها بالماحجير
ازريت أعرف الوقت برده وحره
وبديت باللي عالمٍ بالتدابير
اللي علم فالكون بحره وبره
والله يذكرنا بالآيات تذكير
كلٍ يحصل ما جمع في مصره
في يوم تجمع به اعمالك بتقرير
وكلٍ يحاول للنجاه بمفره
ولا تتبع للنفس من دون تفكير
يا كم واحداً قبلك هوى النفس غره
ترى رفيق السوء ما برفقته خير
من دون خيره ليت يكفيك شره
ومن لا نفع نفسه ما ينفع الغير
وعجاجته دايم تبين بممره
وإذا وردت العد وأدليت بالبير
أبحث عن الماء تاجده في مقره
وان كان رافقت الوجيه المسافير
انا كفيلك ما تجيك المضره
والصاحب اللي ما وقاك المخاسير
الأفضل إنك تبتعد عنه مره
دليلها في حامل المسك والكير
والفرق بين مثل نجم المجره
ولابد ما يبدي من البعض تقصير
واللي يعرف الحق لله دره
والله هو اللي قدر الرزق تقدير
ولا يملك الإنسان لوربع ذره
فديقم محمدالعنزي