الله لنا

يا مكبّرين الوسايد
أفراحكم بالكوم واحزانكم طيش
في كل وقت تولّفون القصايد
وتبدّدون الحبر ما ادري على ويش
أطيبكم اللي ما يضوِّي فوايد
ماخذ طبوع منقّضات العكاريش
ضاقت من صوركم صدور الجرايد
أزوال ما شاالله وفعول مافيش
من عشْق ليلى تجحدون العوايد
وليلى ما تخضع للخبُول الدراويش
معشوقها رجْلٍ وسيع البنايد
حُر مداه بعيد لا نفّض الريش
يحمي كلامه قبل ناقص وزايد
يصون عرْضه منطقه.. ما بعد نيش
ما عاد باقي للمعزه شرايد
من يوم ما صَرّ الذهَب لابس الخيش
والمجد لو يُصنع بكثْر الموايد
رحْنا طعام مدوّرين البخاشيش
بغيت اسمّيكم وأولّع وقايد
لكنّ من خوفي على لقمة العيش
قلت اقصر الموضوع وأبقى مُحايد
صلّى الله وسلّم على صفوة قريش