خاطرة

حظي اللي كل ما قلت أنا عله يزين
صادفه عاروض وأقفى يعود في بلاه
شاف من قته عذابه على مر السنين
شايبٍ رأسه وعمره توهج في صباه
آه يا قلبٍ تعود على صوت الونين
كل ما جريت ونه تريح من عناه
ما يسلي خاطري كود رجمٍ مستبين
آصله بالرجل لو كان عسرٍ مبتداه
يا وجودي وجد من صار له مدة سجين
ينتظر مردود عفوه على يدين خصماه
أو توجد مذهبٍ صار ذوده قسمتين
ما عقلهن جعل من لام عينه في عماه
أتصبر بس ما ودي الخافي يبين
مل قلبٍ باح سده وبذيتوا خفاه
أمحلت عيني من عدود براق الجبين
لو يوافق دمعها وادي زروع سقاه
أشعفتني مثل ما تشعف الخلج الحزين
عقب فقد حوارها أرزمت له من غلاه
جر قلبي وانمزع من عروقه مزعتين
يوم شاف اللي يوده على الصالي حداه