يا فرحة بريدة

جيت أوصف الهمه على راس دوله
تاجٍ كساه النور من ثروة الجود
يومٍ لفى أرض القصيم النفوله
من نور يمناه التي فضلها طود
كن الثرى وردٍ نمى من وصوله
وكن الشذى من عطر انفاسه ايعود
أهل القصيم بجيته وقفوا له
يفدونه بالأرواح والمال والزود
ألفٍ هلا به والمحاني شعوله
نبضة فعاله داخل أعماقنا ارعود
هذا ملكنا بالقدر من ينوله
من فعله اللي يرفع الراس ويقود
أطهر من الما لا توالى نزوله
وأقوى من الهمه على ساس بارود
واكرم من اللي غيثها مرّ حوله
وارسى من القمة على صفوة السود
وأعلى من أشهابٍ مناها تطوله
وأسمى شعورٍ يبني الخير موقود
واحد من سيفٍ به الراي قوله
وارق من فيض الندى عذق وورود
وارفع من احدود الفضا في شموله
واوسع من افاق الصحاري بلا حدود
الحاتمي خاله ونعم الحموله
شمر قبيلة طي تفخر بها اجدود
في قلب فيصل ابن بندر حلوله
ذاك المثابر قدّها حيل واقدود
تزهر مناهل كلمته في فعوله
فيصل سديد الراي بالحق منشود
وسلطان يا منبع صفات البطوله
سيف الفقير اللي كسى نظرته ذود
يخجل سحاب الغيث حزة هطوله
وتصمت مواعيد الكرم ساعة الجود
ما كل يدٍ بالمكارم تطوله
وما كل قلبٍِ يسكنه لين مشدود
وما كل شخصٍ يسعد الناس حوله
مثله ترى في هالزمن صار مفقود
أفعال شبلٍ ما تجي بالسهوله
هذا هو اللي من ثرى العز مولود
يا فرحة بريده ومن عاش حوله
يرقص بها سيلٍ وكثبان ونفود
عبدالله بن عبدالعزيز ما يهوله
بدر الليال ولمعة انجومه اشهود
علّم أسود العرب معنى الرجوله
شيخٍ ولد شيخٍ به الطيب معهود
ما ينكسر ظهرٍ رفع بك حموله
وما ينحني راسٍ لنا وأنت موجود
(والله نحبك) فالحنايا أصوله
حبك يا أبو متعب مع الروح معقود
يكفي قلوبٍ للمعاقين توله
يم الدعاء لله ركّاع وسجود
تفرح عيونٍ من شقاها عذوله
ويسعد بشوفك من له اسنين منقود
الله يتمم عزتك في قبوله
لأعمالك بيومٍ عظيمٍ ومشهود
أزريت ابوصف يا القصايد جموله
من عهد ابو فيصل وكل عامٍ يزود
كنت احسبني لا ذكرته باقوله
أثر القصيد بجيته شي معدود
هذا حبيب الشعب كلٍ يقوله
حتى الصخر بمحبته صار موعود
كفايه اسمه وافتخرنا نقوله
عبدالله بن عبدالعزيز آل السعود