جروح بجروح

وش حيلة اللي جاله الزين واغواه
شافه ودلا يذرف الدمع وينوح
وياهقوتي محدٍ دنا من سواياه
يسهر وقلبه يغلي الدم ويفوح
ينوح نوح الورق من حر ما جاه
ولاهي غريبه يضرب هجوس وسروح
يا ناس هذا الحب وهذي مزاياه
سم يعذب بسرة العين والروح
يقوله اللي جره الشوق واعماه
اللي حياته كلها جروح بجروح
باسباب ظبي ما نبي غير لاماه
من سبته قمت ارفع الصوت وابوح
بيحت سدي يوم قمت اترجاه
ويومه يشوف الدمع بالخد مسفوح
وأنا ويعلم خالق الكون منساه
منساه لو ينسان ويسج ويروح
احب صوته واتلذذ بطرياه
ودنياً بدونه مالنا باه مصلوح
طفلٍ طلب قلبي وحنا عطيناه
مملوح من بين المخاليق مملوح
النور والله باين في محياه
والعين عين مبرقع شافله روح
وأنا احبه واعشقه واتمناه
وبابٍ يجيب الزين بالدوم مفتوح